Hebrews 11

Gele Ele'vole' Ogali'mi Monovo Lo-ngimine'

1Gele ele'vole' oga' monovo nene ne'mino neive: Laza O'mosomu' gele ele'vole' o noo ma aza lemelove lo salani molo-lidine' initekumu' gizebo o none' nene olihe damo ido' a'minesi nene ma ningamune' nenako nomihe ido' lemamilihe lo gate sita' gelamo a'mine inite' nene mo ha noloseinako lemavo dalosune lo a'minemu' nene gele ele'vole' ogovo' minelesune.

2Ido' O'moso'mi evenele gomu' minani' nete a'mine'mine igi gili ele'vole' igi minaa' ani' nemu' nene O'moso'mo inginemu' ninge lamine' daa' ine' ve. 3Ido' O'mosomu' gele ele'vole' o none' ne'mo okulumoku' ido' misubouko inite' mata' muki' soto' ogo neine' nene O'moso'mo lavosavo' soto' ogo neine' nene mo gele none. Ido' ningaa' noune' inite' mata' muki' nene ningesa'mune' initedunu' do soto' molani' nenako nesi nene mo gele none.

4Ido' Adamu' gipele Kainiki Abeliki ingine inite' oloku' gizi O'moso imasinguti' Abeli' aza nene O'mosomu' gele ele'vole' ogo minine' ne'mo uvoloho Kaini'ni nene ivile' ogosa monovolo laminekisi minidoti' inite' lamine' oloku' gize imine' ve. Ne'mine ogavo O'moso aza mo lamine' ve lo dani' nenako ne'mo Abeli' aza ve lisihe' minine' nene mo lelebizavo ningo nogilune. Ido' Abeli' aza nene mo helani' ma neine'za O'mosomu' ne'mino gele ele'vole' ogo minine' ne'mo gamazi've nene ha minivo gelaa' noune.

5Ido' gozopo' aka'mila Enoku' O'mosomu' gele ele'vole' ogo minine' ne'mo olihe helamivo O'moso'mo ele'mize do vine' ve. Ido' ele'mize do vine' nenako ezemu' nene evene' ingine vise' igi ma ningamani' ve. Nemu' nene ei' monovomu' mono' godolou' ti' li gizi nizani' ma neive: O'moso'mo olihe ele'mize do vamine' gamenelasi nene O'moso'mo ninge lamine' do-daa' ine' ve. 6Ne neiha O'mosola vo gi'mizelone li minilizave ingine ezemu' nene ti' li gili gili ele'vole' igi minilizado' o neive: O'moso nene nomine' nevoba mo neive. Ido' eze vise' igi ezela vi gi'mizave nene meni lamine' ngemaa' ive ma ne neive. Ido' ne'mine li gili gili ele'vole' igi minilizado' o neine' nenako ma gili ele'vole' amilizani' nene O'moso'mo engi' ninge lamine' daline' aka nene ma minamoloseive.

7Ido' O'mosomu' gele ele'vole' oga' ive gohi ma Noa'ni nene O'moso'mo evene' ngebeleleseive line' noso nene olihe soto' amivo a'mine noso soto' ilingumu' nene lo soto' ogo lo-emavo Noa' aza O'mosomu' gele ele'vole' ogo minine' ne'mo aza vene' izipesi goloso ogalone lo O'moso'mo lido' gele lamine' o mino sipi ma lolo' ogo noso velo angu' nene gipele zuhosi vene' izipesi nene do ngu' izine'. Ido' ne'mine ogo O'mosomu' gele ele'vole' ogo minine' ne'mo misubouko aleve linge engita monovo goloso minine' nene ngelebizine'. Ido' O'moso'mo ezemu' gili ele'vole' igi minaa' ave mukiliti lu'ine nene do lisihe' o-ngedaa' neine' nenako Noa' aza ne'mine ogo O'mosomu' gele ele'vole' ogo minine' ne'mo nene ei' Noa' lulosi do lisihe' o-dine' ve.

8Ido' Abalahamu' aza O'mosomu' gele ele'vole' ogo minine' nenako nemu' nene O'moso'mo naza gelebizeloni' misubola ga' lo vozo lo lo-davo aza a'mido' gele do vine' ve. Ee, aza vo heteleline' misubo nemukisi nene ningo gelamo gopo eze misubo've hulo O'moso'mo a'vopilemo' zuholiti misubo minelive lo alinge' imine' misubola nene ga' lo vo minine'. 9Ido' O'mosomu' gele ele'vole' oga' ive minine' ne'mo a'mine vozo lo-dine' misubolo' nene vo hetelo a'mida nene gopo venenga ve ne'mine gelo mino O'moso'mo a'mine misubo salani molo-lengedekuve lo lo huko-ngidive sita' ei' gipele Isakaki ido' Isaka' gipele Zakoboki nesi nene a'mida seli numungukovo' ingi monani' ve. 10Ido' seli numungukovo' ongo minine' nene O'moso'mo gala gelo luhuvo izo do soto' ine' numuno ebe' minevo' minevo' ingu' nene alinge' vo holalove lo gala gelo a'minemu' gizebo ogo mino seli numungukovo' ongo minaa' ine' ve.

11Ido' Abalahamu' aza O'mosomu' gele ele'vole' oga' ive minine' ne'mo nene O'moso'mo gipa ma gedelesane lo lo huko-dine' nenako nemu' aza go'ne ngelo izamoloseinako mo gedelesuve lo gelo gele ele'vole' ogo minine' ne'mo elenaho Sala' aza gohuno vene' neivo ido' Abalahamu' aza ozoho molo izipe gedeli gamene osu' lavo ne'mini minasido' nene O'moso'mo Sala'ni izipe molo emeline' amuzo emavo Isaka'ni gidine'. 12Ne'mo Abalahamu' eze nene mo ozoho molo vani goloso molo minidoti' nene a'vopilemo' mukiliti avo'nibo lolo' ine'. Ei' hamokuti' nene a'vopilemo' vai' goloso soto' igi okulumoto' sonohi' ne'mine ido' noso gahevela gepe ne'minisa soto' igi evenelitesi gati nanike' nilizahe li ningamilizado' ne'mine minani' ve.

13Ido' a'mine mene lo-lingimuve muki' ingine nene O'moso'mo ngemelove lo salani molo-ngidine' inite' nene olihe engita soto' amivo hili vani'za a'mine inite' soto' iline' gamene nene olihe hoto' ha neivo mo soto' oloseive li ningi gili lanite' gili gili ele'vole' igivo' mini hilani'. Ido' ne'mine igi mini hilani' ne'mo ingine nene me misubou' mine gili' lo minelonive minamo ha venenga ve ne'minevo' gelo minelonive nene none li li soto' igi minani' ve. 14Ido' evene' ma ingine gamazi ne'minevo' nilavo ma nene ne'mo ingine mo mini gili' lilizani' ebe'ine atokumu' vise' igi gizebo igi nizave lo gelelesune. 15Ido' ingine gomu' mini mili minaa' ani' misubo'ninguko tine' mili gohi ma vilisa giladiniko tine' mili viliza aka'ine nene ha ngolo' lo minivo mo tine' mili vikedine. 16Vikedine'za ingine minani' misubo ivile' ogo minine' ebe' Okulumoku' neine' nela lu'ine nene vavo a'mine misubou' nene ha gopo minani' ve. Ido' ingine ne'mine igi minaa' ani' nemu' O'moso aza engi' O'moso'ine minine' nemu' nene O'moso'ine nouve loo lo soto' olosa ovozo helaa' ine' nevoba olize izo lo soto' oga' ine' ve. Ido' aza nene engi' alinge' miniliza numuno ebe'ine do soto' ogo molo-ngidine' nenako ne'mo nene engi' O'moso'ine minine' nemu' ovozo helamaa' ine' nene mo gele none.

17Ido' O'moso'mo Abalahamu'ni nene nenikumu' gele ele'vole' ihe amihe lo emengu' molo gipele Isaka'ni nene belo oloku' gize nemezo lavo Abalahamu' aza O'mosomu' gele ele'vole' ine' ne'mo gipele Isaka'ni nene belo oloku' gize emelesa ine'. Ee, gomu' nene a'mine Isaka'nimu' nene Abalahamuda O'moso'mo gamazi ato' ato' lo lo huko-do ti' lo line': Gei' guliveka di mini soto' igi mini-di dizilizani' ga'vopilemo' zuho nene a'mine Isakadatikovo' soto' ilisave lo lo-emavo Abalahamu' aza gele lamine' ogo a'minemu' nene gele ele'vole' ine'za Isaka' aza helaavo ma O'moso'mo gohi do ote-do lo huko lo nimine' gamazi nene ha do gihile izelido' o neive lo gala giline' nenako O'moso'mo lavo aza nene a'mine gipele hamo' Isaka'ni nene belo oloku' gizo O'moso lehize-delesa ine' ve. Ido' Abalahamu' Isaka'ni belelesa gamuno' neivo O'moso'mo geto o've lo-damidini Abalahamu' aza belavo mo heladinako nemu' nene hilinguti' O'moso'mo do tine' molo-davo ele'mizo ani' gelave.

20Ido' Isaka' aza O'mosomu' gele ele'vole' ogo minine' ne'mo gipele Zakobongi Esaungi engita alinge' soto' o-ngemeline' inite' nemu' nene lo-ngemo no'noho' ize-ngidine'.

21Ido' Zakobo' aza O'mosomu' gele ele'vole' ogo minine' ne'mo helelesa mininguti' nene Zosehe' gipele sita' nene hamo hamo' Zakobo' no'noho' ize-ngidine'. Ne'mine ogo zalo' do oto gubi' izo O'moso opo'ni line'.

22Ido' Zosehe' aza O'mosomu' gele ele'vole' ogo minine' ne'mo vani molo helelesa minine' gameneu' nene Kanaha misubo nene O'moso'mo ngemelove lo salani molo-ngidine' nenako neze zuho Isilaele' aleve ingine Aigita misubo nene huli Kanaha misubola tine' mili vilisave lo gala gelo gele ele'vole' ogo a'minemu' lo-ngemo ido' neni' amuzo'ne nesi nene di vii a'mine Kanaha misubola galese izilizave lo lo-ngimine'.

23Ido' Mose' soto' ogavo izelehoi melehoi ningasine' nene izipe lamine' goloso soto' ogavo ingine O'mosomu' gili ele'vole' igi minasine' ne'mo Aigita aleveti guve'inesi ve Halao' aza Isilaele' alevelati' gipe'ine ma soto' ikevo ma mo ngibili hili'mi vivo' minilisave lo lo huko-ngidingumu' nene golise gilami gili huli a'mine gipe'ine nene di haleki di minasivo ike'ni sito hamo vine'.

24Ido' Halao' aluvo'mo Mose'ni nene do mongizavo minine' nenako aza nene ei' gipele gelo mino Aigita vetingu' evene' naba mino ne'mi lanite've ato ato' gelo minidine'za aza lodive ogosa O'mosomu' gele ele'vole' ogo minine' ne'mo O'moso'mo ei' evenele meni ngemelingu' nene nezesi nemelive lo nemu' lulo molo minine' nenako nemu' nene Aigita ve nete Isilaele' aleve ingine Kilisito' zuho ne'mine lili' igi minadi'mo di u'musupo lizi-ngidavo minangu' nene nazasi vo holo engikisi mulumo gelo mineloni' nemu' O'moso'mo meni'ne nemeline' ne'mo Aigita misubou' heneni nganeni minine' nene ivile' o neive lo gelo ido' naza nene Aigita aleveti monovo golosolo' nene e'meto ne'mi lanite've nene nazasi ha gelo mineloni'za a'mine lanite've nene geto osu' liline' nenako nemu' nene ne'mine amo naza nene O'moso'mi evenele Isilaele' aleveu' nene vo holo engi' goboni mili-ngidangu' nene makato' mino mulumo alumo gelo minelone lo O'mosomu' gele ele'vole' ogo minine' ne'mo Halao' aluvo'mi gipele ve li-nidamilizave lo o've lo golise vine'. 27Ido' O'mosomu' gele ele'vole' ogo minine' ne'mo guvelesi ve Halao' ne'mi golise've gelamo Aigita misubo hulo vine'. Ee, O'moso nene vetedunu' ngelo ningamolonido' o minine'za Mose' aza O'mosomu' gele ele'vole' ogo minine' ne'mo aza nene O'moso ninge neine' gele minivo minine' ne'mo nene Aigita misubo hulo O'moso'mo imine' gono nene hulamo geni bilingukisi ha amuzo molo do'mo vo minine'. 28Ido' Mose' aza O'mosomu' gele ele'vole' ogo minive minine' nenako ne'mo nene aza ne'mine ine' ve. O'moso'mo angelo' ma imiselavo ogo Aigita aleveti gana' gipe'ine ngebelelingu' nene Isilaele' aleve leze gipetesi ngebelalive lo Mose' aza angeloli'mo ise'ine izeline' akalo' ngele'mize molo O'moso'mo lido' e'meto evene' lo-ngedavo Isilaele' aleve ingine sipisipi angale nene ngibili vanise'ine nene numu'ine gatedo' gatedo' nene noso mili hibi' izi hilika' hilika' ani' ve.

29Ido' Isilaele' aleve ingine O'mosomu' gili ele'vole' ani' ne'mo guvo noso ma gulive Gulehe' Noso nene izo huko eza ema ogo goko' misubo ne'mino minine' gele minivo a'mingu' liki vani'. Ido' Aigita aleve inginesi a'mine'mine ogo volone li nivavo guvo noso ne'mo ihe' ogo do su'mize-ngedavo noso nii hilani'.

30Ido' Isilaele' aleve ingine O'mosomu' gili ele'vole' igi minani' ne'mo O'moso'mo lido' e'meti Zeliko numuno ebeli'mi gesi gehenidunu' gizani' gesi ha'na nene go' laneme go' laneme nene gamene hamo hamo' di vodo vodo i-dika' i-dika' igi nizavo gamene seveni (7) ogavo a'mine gamene seveni (7) ne'mi lulou' nene gohi gamene seveni (7) ne'mine di vodo vodo i-dikevo a'mine gehenidunu' gizani' gesi nene ngululubizo lemo ongavo Isilaele' aleve a'mingu' dizi Zeliko aleve ngibili gese' ani'. 31Ido' Isilaele' aleve lovo di Zeliko ebeku' olihe alisa navo a'mine ebeku' minine' pasidia' alu Lahaba' aza api' ogo O'mosomu' gele ele'vole' ogo minine' ne'mo Isilaele' ve sita' a'mine numuno ebe' Zeliko nene amamaka' mili ningi alisa vasive nene do lamine' o-ngedo numu'veu' ngele'mize molavo nemu' nene alinge' Isilaele' aleve nete igi Zeliko aleve O'moso'mi gamazi gili hulani' ngibili gese' angu' nene Lahaba'ni nene bilami iseve izi-dani' ve.

32Ido' a'mine luvoni' evene' ingine O'mosomu' gili ele'vole' igi minani' ne'mine igi evene' linge muki' ingine a'mine'mine igi O'mosomu' gili ele'vole' ani'za naza nGideoni' ve Balaka' ve Samusoni' ve Zehita' ve Davidi' ve Samueli' ve ido' O'moso'mi veleti' gamazi li soto' iga' ave polohete linge muki' engi' neti gamazi lo osu' lo lolosa luvodiniko lo do vo nouvo ha'na idine. Nemu' nene gamazi linge nene ngelo ma lo osu' lamolosuve. 33A'mine ve ingine O'mosomu' gili ele'vole' igi minadi'mo O'moso'mo hize ele' o-ngedo neivo engikuti' linge ma nete amuzo mili misubo mala mala vi O'mosomu' gilamave nene lovo i ngimi ngivile' igi engita di gelekele' i-ngidani'. Ido' engikuti' linge ma nete engi' misubo'ningu' nene monovo lisihe' laminekovo' minelive li evene' di lisihe' i-ngidaa' ani' ve. Ido' O'moso'mo ne'mine mana'mine inite' do soto' o-ngedelove lo lo huko-ngidine' gamazi nesi nene engita gihile izaa' ine' ve. Ido' engikuti' evene' linge ma nete loposo gulo laioni nete ngibililisa ikevo ma a'mine laizoni nete libilikelizave li evene' nete aka'ine nene hizi tili-ngidaa' ani' ve. 34Ido' engikuti' linge ma nete ololi'mo lo'vote-ngedelesa ine' amuzo've nene di hongu li-daa' ani' ve. Ido' linge ma nene lovo ve nete bainati mite' nedunu' ngibilaa' ani'za ingine olovo' lamine' ikevo bainati mite' ne'mo ngebelamaa' ine' ve. Ido' linge ma ingine gilizevo minanguti' nene amuzo ve lili' igi minaa' ani'. Ido' misubo mauti' ve igi lovo i ngimaa' angu' nene linge ma nete amuzo mili mini ngimiseli di vaa' ani' ve. 35Ido' vene' linge ma nene izipaha'ine hilikenguti' nene O'moso'mo do ote-ngedavo gohi ize'ningida igi gi'mizaa' ani' ve. Ido' linge ma ingine O'mosomu' gili ele'vole' igi minani' ne'mo ve malite gavoso ngibili goboni mili-ngidi ti' li li-ngidaa' ani' ve: Isetine izo gavoso lengebelamoloniko lingine O'moso mehedine imi mono' nene hulilizave li ne'mine li-ngidaa' ani'za alingeta hele noloninguti' gohi oto minevo' minevo' lemeni dameni lamine' doso' ma nenave li gili huli nizavo ngibilikevo hilaa' ani' ve. 36Ido' linge ma nene evenelite gamazi goloso palasa li-ngidi gize zohi' i-ngidi amuzo malehe nala' izi lobe tobe' ani' nedunu' nene ngibilaa' ani' ve. Ido' linge ma nene gize'nido' a'nido' seni nala' izi-ngidi huli nala' numungu' i-ngidaa' ani' ve. 37Ido' linge ma nene gehenidunu' huli huli' igi ngibilaa' avo hilaa' ani' ve. Ido' linge ma nene ngibili giti seta' iga' ani' ve. Ido' linge ma nene bainati mite' nedunu' ngibili hilaa' ani' ve. Ido' linge ma O'mosomu' gili ele'vole' ani' nemu' ngimiseli hulikevo oko'nido' inite'ine nomivo sipisipi losuvo ido' meme' losuvo nedunukovo' oko'nido' ngili moni oko'ine losuvo'mi inite' noso' initekisi ido' genegana'inesi muki' nene nomivo nimonavo goboni mili-ngidi di goloso i-ngidaa' ani' ve. 38Ingine O'mosomu' gili ele'vole' igi evene' lisihe' lamine' minadi'mo evene' linge muki' nene engito' lisihe' igi minamani'za a'mine aleve nene evenelite vasa izi-ngidikevo guhali hali igi vi evene' nizamada ebe' hadivela ido' golola geheni muliku' ido' misubo luloukisi gopo ingaa' ani' ve. 39A'mine mene aleve muki' ingine ezemu' gili ele'vole' ani' nemu' O'moso'mo ningivo lamine' ine'za lehize-ngedelove lo evenele zuho lo molo-ngidine' inite' nene olihe dami hilani' ve. 40Ido' a'mine O'moso'mo ngemelove lo lo molo-ngidine' inite' nene olihe dami hilani' nene nanitekumu' ve. O'moso'mo leli' olihe soto' amunivo engi' lehize-ngedeloni' inite' nene gomu' mili mudise dalizado' lisihe' i nizaha gizebo igi nizavo lelikisi makato' dalone' nene lamine' oloseive lo gomu' gele minine' nenako nemu' nene ingine olihe dami hilani' ve.